Lakserømming i Sognefjorden
Fiskeridirektoratet følgjer opp ei rømmingshending hjå Aller Aqua AS i Vadheimsfjorden i Høyanger. Laksen som har rømt er i underkant av 5 kg i storleik.
Hendinga
Aller Aqua meldte laurdag 29. oktober om ei rømmingshending på lokaliteten Floteneset i Høyanger kommune i Vestland. Det var då oppdaga eit stort hol i ei av nøtene på anlegget.
Fiskeridirektoratet har pålagt selskapet å drive gjenfangst i Vadheimsfjorden, ut til Langeneset-Verpeneset. Dette fisket føregår med innleidd fartøy og reiskap som er tydeleg merka.
Omfanget av rømminga er ikkje avklart. Fisken som har rømt har ei snittvekt på i overkant av 4,8 kilo og var slakteklar. Selskapet har så langt registrert ein gjenfangst på ca. 250 oppdrettslaks.
Fiskeridirektoratet vil følgje opp med tilsyn hjå selskapet.
Fiskeridirektoratet ønskjer tips i nytt digitalt tipssystem
Personar som ønskjer å melde inn tips om fangst av oppdrettslaks i området, kan gjere det her: Tips Fiskeridirektoratet.
Legg gjerne ved bilde av fisken.
Tipsa vil vere til hjelp for å vurdere omfang og spreiing av oppdrettslaksen.
Mottak av fisk og dusør
Aller Aqua har oppretta mottaksstasjon på Vadheimskaien, for dei som ønskjer å levere inn oppdrettslaks dei har fiska. Selskapet opplyser at dei vil betale 200 kr for kvar fisk som blir levert. Ein må på førehand kontakte selskapet på tlf: 95030591.
Publikum må følgje gjeldande fiskereglar for området (statsforvalteren.no)